La 90-a Kongreso de SAT (Sennacieca Asocio Tutmonda) okazis de la
29-a de julio ĝis la 5-a de aŭgusto en la urbeto Gimpo, apud Seulo, Koreio. Dum
la semajna kongreso 105 kongresanoj el 23 landoj, 6 kontinentoj plenplene ĝuis
liberecan kaj sennaciecan etoson de la kongreso, kiu estis unuafoje okazigita
en Azio.
Pli ol 20 prelegoj estis
preparitaj por la kongresanoj el 23 landoj. Krom la tagoj de la kongresa
ekskurso, energiaj prelegoj kaj intensaj diskutoj daŭris dum la kongreso pri
jenaj temoj: Veganismo, Nuklea Akcidento en Fukuŝimo en Japanio, Evoluo de A.I.(Aretefarita
Inteligento) kaj ĝia influo al socio, Kandelluma Revolucio en Koreio dum
2016~7, Absoluta Demokratio – Demokratiigo de Ĉiuj Demokratioj, La Rusa
Revolucio en 1917, Pri Unuiĝo de Nord- kaj Sud-Koreio, Influo de Pejzaĝo,
Esperanto Movado, Lingvaj Problemoj, Nuntempa Monda Kapitalismo, Nuntempa
Situacio de Kubo kaj D.R.Kongo, Fak-agado en la Reto(Fejsbuko) ktp.
Samtempe okazis laborkunsidoj
de SAT, en kiuj estis proponitaj diversaj opinioj pri la administrado kaj
evoluplanoj de la SAT-movado, kaj kunsidoj de diversaj frakcioj de SAT, kiaj
Sennaciista, Liberecana, Vegetara, Komunista, Verdula ktp.
Multaj prezentaĵoj, kiaj Korea
Folklora Danco de Espera Mondo, Koncerto de la familia muzikgrupo el Litovio
Sepa Asorti, Komedio "La Malfermilo", Aŭkcio per Esperantaĵoj, Korea
Opero “Ariari”, Japana Te-ceremonio, Muzikado de diverslandaj muzikiloj,
Revoluciaj kantoj ktp, gajigis la ĉeestantojn ĉiuvespere.
La 90-a SAT-Kongreso finiĝis
esprimante esperon pri kiel eble plej rapida okazigo de la duafoja SAT-Kongreso
en Azio. La SAT-flago estis transdonita al la reprezentanto de la urbo
Kragujevac de Serbio, kiu gastigos la 91-an kongerson en 2018.
Deklaracio de la 90a SAT-Kongreso
La 90a
Kongreso de SAT, okazinta en Gimpo/Seulo, Suda Koreio, de la 29a de Julio ĝis
la 5a de Aŭgusto 2017 :
salutas la okazigon de la Kandelluma Revolucio
en Suda Koreio, en kiu multaj homoj kunvenis kaj manifestaciis por ŝanĝi
la registaron, kio estas kuraĝiga demokratia evento ; agnoskas la gravecon de popolamasaj kontraŭstaroj al maljustaj
registaroj, kiel montris la kandelluma manifestacio en Suda Koreio, avertante
kontraŭ la klopodoj de amaskomunikiloj kaj politikistoj manipuli ilin, kaj ĉefe
kontraŭ la evidentajn drivojn al milito, kiel okazis en Sirio ; apogas finigon de konflikta stato inter Norda kaj Suda Koreioj kaj
subtenas daŭran pacigon de la regiono por komuna vivo kaj interkomprenemo de la
popoloj, kiuj vivas en la region ; sugestas pacajn interparolojn en militaj konfliktoj kaj kondamnas
ĉiajn sangsoifantajn militaliancojn, unuavice la Nord-Atlantikan
Traktat-Organizon (NATO) ; postulas decajn vivrimedojn kaj laborkondiĉojn por teni homecan
vivon al ĉiuj laboristoj en la tuta mondo ; notas ke bestobredado estas grava fonto (krom petrol-industrio kaj
aliaj) de klimatvarmiĝo kaj ke, konsekvence, pli vegetaĵa dieto estas efika
agado laŭ ekologia kaj ankaŭ etika vidpunktoj ; kontraŭas, en sia celado al justeco, la suferigojn kaj
ekspluatadon rilatajn al seksismo kaj rasismo ; kontraŭas mistraktadon de bestoj kaj speciismon ; kontraŭas la uzadon de nuklea energio, ĉar la akcidento de nuklea
centralo en Japanio, 2011, ĝisfunde detruis kaj eĉ nun daŭre detruas ĉiutagan
vivon de la loĝantaro ; malakceptas ĉiujn nukleajn armilojn, rimarkante la Traktaton pri
Malpermeso de Nukleaj Armiloj de UN, rezoluciitan en julio 2017 ; subtenas la agadon de Solidareco Bona Volo (SBV) en Demokratia
Respubliko Kongo por helpi edukadon de junuloj, kiuj suferis pro la
militoj ; instigas ke ne nur SATanoj kaj esperantistoj, sed aktivistoj
ĝenerale pli efike kaj aktive kunlaboru kun kamaradoj el Azio, kadre de nia
praktika subteno al la tutmonda solidareco.
Gvidrezolucio de la 90a SAT-Kongreso
La
90a Kongreso de SAT okazinta en Gimpo/Seulo, Suda Koreio, de la 29a de Julio
ĝis la 5a de Aŭgusto de 2017 :
Pri
la ĝenerala funkciado de SAT :
dankas kaj gratulas la kamaradojn kiuj agadis dum la lastaj jaroj
por la funkciado de SAT, ĉu en la Plenum-Komitato, ĉu en la Ĝenerala
Konsilantaro, ĉu en Sennaciulo, kaj kiel perantoj kaj kiel aktivuloj, same kiel
instigas la ceterajn SAT-anojn helpi ilin kaj kandidatiĝi por la diversaj
postenoj en la ideo ke la jam spertaj kamaradoj lernigos pri la diversaj
taskoj, kaj aparte salutas la kamaradon Eduardo Vivancos, la nuntempa plej malnova
kamarado de SAT, kaj agnoskas lian longdaŭran engaĝiĝon kaj kontribuon al la
SAT-movado ; kuraĝigas la renaskiĝon de la Pacista Frakcio, okaze de la debatoj
pri la reunuiĝo de la koreaj ŝtatoj ; proponas krei Jutuban kanalon de SAT kaj prizorgi ĝian nutradon
per notinde filmetoj kaj porkongresaj kaj prikongresaj ;
Pri
la Plenum-Komitato :
petas ke la Plenum-Komitato esploru pri rimedoj kiel fari nian
asocion kaj niajn kongresojn pli demokratiaj ;
Pri
Sennaciulo kaj Sennacieca Revuo :
emfazas la pluan neceson ke SATanoj regule kontribuu kaj
kontribuigu ankaŭ ne SATanojn ; proponas al la redakta teamo de Sennaciulo havi klaran proceduron
por akcepto, malakcepto kaj prokrastigo de artikoloj kaj aliaj kontribuoj, ĉefe
kiam temas pri polemikigaj ; speciale dankas kaj gratulas la ĉefredaktorojn de Sennaciulo kaj de la Sennacieca Revuo, ĉefe Pedro Sanz, pro la efika rezulto
en la plibonigo de la gazetoj, kaj la ceteron de la teamo kaj
kontribuantoj ;
Pri
la Eldona Fako Kooperativa :
kuraĝigas aperigon de “La silento de l’armiloj” kaj “Antaŭ unu
jarcento” kaj, laŭeble, de aliaj projektoj (kiel “12 kugloj…” rete kaj “Reĝo
Ubuo” papere) ; petas
anojn de la Eldonkooperativo ĝisdatigi la publikan projektoliston ;
Pri
la sidejo :
sugestas ke ni daŭre plibonigu la kondiĉojn de la SAT-sidejo, por
ke ĝi iĝu pli taŭga loko por prelegoj, kunvenoj kaj por la konservado de la
arkivoj ;
Pri
la kongresoj :
emfazas la bezonon inkluzivi pliajn debatojn pri feminismo, inaj
rajtoj kaj GLAT-rajtoj ; proponas diskutadon en la venontaj SAT-kongresoj pri la laboristaj
movadoj, precipe por sciigi al ni pli detale niajn laboristajn kondiĉojn
reciproke, kaj por diskuti kiel ni faru kontraŭbatalon kaj solidarecan movadon,
ĉar laboristaj kondiĉoj pli kaj pli malboniĝas ; instigas la partoprenantojn de la venontaj SAT-kongresoj al
memvola elekto de facile komprenebla nomo laŭ la esperanta sonaro (karesnomo,
esperantigita prononco de sia nomo, ktp) ; konstatinte la ĉijaran oportunecon de proksimaj tempo kaj loko de
la Universala Kongreso de Esperanto kaj de la SAT-Kongreso, instigas la
Plenum-Komitaton esplori ree tiajn kondiĉojn ; esprimas apartan aprezon pri la riĉaj kaj variaj manĝoj por
vegetaranoj kaj veganoj, kaj esperas ke la sekvantaj OKKj daŭrigos ĉi tian
iniciaton ; gratulas
la OKKn de la Gimpa/Seula kongreso, kiu sukcesis per malmulta homforto organizi
tre bonan kaj brilan unuan kongreson de SAT en Azio, kaj kuraĝigas aziajn
kamaradojn surbaze de tiu sperto klopodi prepari pliajn SAT-kongresojn en Azio
en proksima estonteco ; invitas SATanojn aparte, kaj ankaŭ progresemajn esperantistojn
ĝenerale, jam aliĝi al la 91a SAT-kongreso okazonta en Kragujevaco, Serbio,
inter la 5a kaj la 12a de aŭgusto 2018 ; gratulas la OKKn pro la decido ne mencii la nomon de landoj en la
nomŝildoj de la kongresanoj, kio kongruas kun la celoj de SAT kaj kun la ideoj
de sia membraro. //
No hay comentarios.:
Publicar un comentario