Unu el la plej famaj
verkoj pri la Esperanto-historio, La danĝera lingvo de Ulrich Lins, aperis ĉe
UEA en nova, reviziita eldono ĝustatempe por prezento en la 101-a UK en Nitro.
Ĝi estos havebla ankaŭ en la SAT-kongreso en Herzberg kaj mendebla ĉe la
Libroservo de UEA.
Diktatoraj reĝimoj
kaj fanatikaj ideologioj stampis Esperanton danĝera lingvo, plej forte en la
nazia Germanio kaj en Soveta Unio sub Stalin. En sia detale dokumentita kaj
riĉe ilustrita libro la germana historiisto Ulrich Lins montras, ke Hitler
kondamnis Esperanton kiel ilon por la mondregado de judoj kaj ke Stalin,
likvidante la revolucian internaciismon, subpremis la Esperanto-movadon kaj
kaŭzis al ĝiaj anoj grandan suferadon kaj eĉ morton.
La unua eldono de La
danĝera lingvo aperis en 1988 ĉe la germana eldonejo Bleicher kaj kiel represo
ĉe Progreso en Moskvo en 1990. Aperis tradukoj en la germana, itala, japana,
rusa, litova kaj korea; baldaŭ aldoniĝos ankaŭ angla eldono. Por la nova
Esperanto-versio la teksto estis plene reviziita kun utiligo de fontoj, kiuj
iĝis alireblaj nur post la germana reunuiĝo kaj la disfalo de Soveta Unio.
La danĝera lingvo:
Studoj pri la persekutoj kontraŭ Esperanto. Ulrich Lins. Kovrilo kaj
ilustraĵoj: Francisco L. Veuthey. UEA, 2016. 375+24p. Prezo: 18,00 EUR (triona
rabato ekde tri ekzempleroj).
En
la reta katalogo:
Danĝera lingvo, La, Studo pri la persekutoj kontraŭ Esperanto. Ulrich Lins, Movado, UEA, 2016. Nova, plene reviziita historio pri la atakoj kontraŭ la E-movado, precipe sub Hitler kaj Stalin, sed ankaŭ en la cara Ruslando kaj la orienta Azio. Prezo: 18.00 EUR, triona rabato ekde 3 ekz. Pliaj informoj, reta mendilo: http://katalogo.uea.org?inf=
No hay comentarios.:
Publicar un comentario